انتقاد وهـ.جوم لاذع.. مخرج سوري يسخر من مسلسل “على صفيح ساخن”
شن المخرج السوري جمال داود على صفحته على فيسبوك، هجـ.وما عـ.نيفا وانتقادا لمسلسل “على صفيح ساخن”.
وفي تعليقه على المسلسل كتب جمال داود سلسلة منشورات تناولت توجه المسلسل وأداءه يقول فيها:
مبارح بلشت اتفرج على مسلسل “على صفيح ساخن” أكتر دور حبيته هو دور الآغا رئيس اللميمة كلهن.. تاني دور لبقله للفنان عبد الفتاح من أيام زاهي أفندي. أنا قلت بعد زاهي أفندي مستحيل يعمل دور تاني يتفوق عليه. بتصور حتى طلع الطقومة تبعه يلي كان مخبيهن من أيام مسلسل أبو كامل 1991 وما اضطر يشتري أي شي جديد.
***
عندي كم سؤال قبل ما كفي مسلسل على صفيح ساخن…
ليش في عنا شرطة كاتبين على ضهرن Police وفي شرطة كاتبين شرطة بالعربي؟ مفكرين تبيعوا المسلسل لنيتفليكس؟
سؤال تاني: الممثلة يلي قامت بدور دارين هي عاملة إعلان مدفوع لمركز القضماني تبع البوتوكس؟ سبونسر يعني؟
سؤال تالت: باسم ياخور ايمت رح يفوت بالدور تبعه ويبطل اندهاش؟
سؤال رابع: مشهد فوتة ابن المسؤول عالاذاعة وتهديد المذيعة بانه توقف البرنامج وهي هددته انها تذيع اسمه عالهوا وتفضحه قدام بيه المسؤول لأنه ما بيرضى عن هيك حركات. هاد فانتازيا تاريخية؟ ولا دراما معاصرة؟
سؤال خامس: الفنانة سمر سامي موجودة فعلا بالمسلسل ولا أنا عم اتخيلها؟
السؤال الأخير: أمل بوشوشة ليش بتحكي شامي؟
***
منيح نحنا عنا بسوريا حسوا مافي أمل من الصراع على الحكم.. قام عملوا مسلسل عن صراع نباشة الزبالة. هاد الشي الوحيد المسموح نتصارع عليه.
***
معلش يا فنانتنا سمر سامي الشوام اضطروا يشحدوا على بواب الجناين بهاد الزمن… معلش شو بدنا نساوي من لما صاروا يحطوا “الترامادول” بالحلويات ويضروا هالمجتمع كله وينبشوا بالمزابل. بالنسبة لباقي المحافظات بقا الله يعينن ع هالشوام.. حاكمين هالبلد بالقوة شو بدنا نساوي.
***
مسلسل على صفيح ساخن تاني مسلسل سوري بيحقق كل أحلام فرع التوجيه المعنوي والمساعد حيدرة وقناة سما عن الشوام [الدمشقيين].. من لما طلع مسلسل (ما ملكت أيمانكم).
***
عزيزي الكاتب علي وجيه:
قصة أنه الشوام يحطوا الترامادول بالحلو ببلاش لحتى يدمن عليها الزبون مو زابطة، مو لأن الشوام بخلا، لأن الحلو تبع الشوام من دون أي اضافات بيعمل إدمان.
يمكن أنتو باللادقية مفكرينو هيك.
